Litlu-jól

Nú er tæp vika til litlu-jólanna í skólanum og ýmislegt sem er framundan. Þrátt fyrir ofankomu og smávegis vind í kortunum stefnum við á að halda okkar striki. Spáin lítur ekki  illa út með morgni (þriðjudag), þrátt fyrir að sumir nemendur gætu orðið eitthvað seinir vegna ófærðar. Ef skólafall verður mun verða hringt í foreldra um klukkan 7:30. Restin af vikunni lítur bærilega út hvað veður snertir.  

Veðurútlitið er best fyrir miðvikudag. Þá ætlum að tendra friðarljós í Álfaborginni og kveikja á ljósum fyrir hvern nemanda í grunn- og leikskólanum en auk þess kveikjum við á kerti fyrir foreldrana og heimilin, fyrir kennarana og samfélagið hér á Borgarfirði, fyrir mikilvægar manneskjur sem eru ekki með okkur nema í anda, fyrir alla á Íslandi og alla í heiminum, og fyrir álfana í Álfaborginni ☺. Þetta eru samtals um 25 kerti. Að þessu sinni steyptu nemendur kertin sjálf úr borgfirskri tólg. Munum eftir hlýjum fatnaði þessa vikuna, mikil útivera verður á miðvikudaginn.

Stofujól verða haldin föstudaginn 19. og litlu-jólin hefjast sam dag klukkan 18:00 í Fjarðarborg - foreldrar og sveitungar okkar verið velkomin í Fjarðarborg klukkan 18:00 þann 19. desember. Gott kaffi og girnilegar veitingar til sölu eftir nokkur söng- og leikatriði frá nemendum. Dans, söngur og stemming áður en við höldum í jólafrí.

Skóli hefst aftur eftir jólafrí mánudaginn 5. janúar 2015 kl 8:00.